Այսօր միջազգային հանրությունը հետևում է Պակիստանում սպասվող ԱՄՆ-Իրան բանակցությունների ընթացքին։ ԱՄՆ փոխնախագահ Ջեյ Դի Վենսն արդեն Պակիստանի մայրաքաղաք Իսլամաբադում է, իսկ ավելի վաղ քաղաքում վայրէջք էր կատարել Թրամփի հատուկ բանագնացներ Սթիվ Ուիթքոֆի և Ջարեդ Քուշների ինքնաթիռը։
Իրանական պատվիրակությունը, որի գլխավորությամբ է Իրանի խորհրդարանի նախագահ Մոհամմադ-Բաղեր Ղալիբաֆը, նույնպես ժամանել է Իսլամաբադ։ Պատվիրակության մեջ են մտնում արտգործնախարար Աբբաս Արաղչին, փորձագիտական խմբեր, լրատվամիջոցների ներկայացուցիչներ և անվտանգության աշխատակիցներ։
Ղալիբաֆը սոցցանցի իր էջում լուսանկարներ է հրապարակել, որոնցում երևում է, որ Իրանի պատվիրակության ինքնաթիռում դրված են եղել Մինաբի դպրոցում զոհված աշակերտների լուսանկարները։
Իրանական կողմը հայտարարել է, որ բանակցությունները կտևեն ընդամենը մեկ օր։ Ըստ Ղալիբաֆի՝ եթե ԱՄՆ-ը խաբի բանակցությունների ժամանակ, Թեհրանը համապատասխանաբար կպատասխանի։ Նա նաև նշել է, որ իրանական կողմը բարի մտադրություններ ունի, բայց չի վստահում Միացյալ Նահանգներին։
ԱՄՆ փոխնախագահ Ջեյ Դի Վենսն էլ հույս է հայտնել, որ բանակցությունները կլինեն դրական։
Հարավային Կովկասում Իրանի ռազմավարական դիրքորոշումը կարող է ամրապնդվել, եթե Միացյալ Նահանգներն ավելի ազդեցիկ դառնա տարածաշրջանում։ Այս մասին ասաց ռուս վերլուծաբան Ալեքսանդր Խրամչիխինը՝ նշելով, որ կողմերի միջև առկա հակասությունները հիմնարար բնույթ են կրում։ Նրա կարծիքով, ամենահավանական սցենարը «փոքր քայլերի» մարտավարությունն է կամ հրադադարի ժամանակավոր երկարաձգումը։
